Ayuda sa Kapitolyo sa mga seniors nagpadayon
CEBU, Philippines – Padayong gihatagan og ayuda sa Kapitolyo ang liboan ka senior citizens ubos sa "Halad sa Gugma Alang kang Lolo ug Lola" nga programa.
Ang maong programa nagsugod niadtong panahon pa ni kanhi gobernador Gwendolyn Garcia ug gipadayun ni Gobernador Hilario Davide III.
Ang Kapitolyo nigahin og dili mominus P8 milyones karong tuiga alang sa maong programa diin makadawat ang mga benepisyaryo og tag tulo ka kilong bugas, 150 grams nga gatas, mga de lata sama sa sardinas, noodles ug health kit sa ilang panglawas.
Matud ni Marina Abear, executive assistant IV sa buhatan sa bise gobernador, nga mohatag lang og request letter ang barangay kapitan o mayor nga adunay listahan sa mga senior citizens ngadto sa buhatan sa gobernador.
"The moment maka-receive mi og request with list of senior citizens, mao to magputos dayun unya mag-schedule dayun mi," matud ni Abear.
Sa niaging tuig, kapin 100,000 ka senior citizens ang nakabenepisyo sa programa gikan sa 997 ka barangay sa probinsiya sa Sugbo.
Enero ug Pebrero karong tuiga, aduna nay natala nga 10,691 ka senior citizens gikan sa Dakbayan sa Mandaue, Alegria ug Badian ang naalagaran na. (Caren Abing, CNU Interns/GMR)(BANAT NEWS)
- Latest
