Tanod, bantay dagat makadawat sa incentives
CEBU, Philippines – Ihatag na sa kagamhanan sa Siyudad sa Sugbo ang honorarium sa mga barangay tanod sa buwan sa Enero ug Pebrero karong adlawa.
Nagkanayon ang pangulo sa Cebu City Office for Substance Abuse Prevention (COSAP), Garry Lao, nga ang mga tanod gikan sa 21 ka barangay ang hatagan sa honorarium.
Kini gilangkuban sa Punta Princesa, Lorega-San Miguel, Basak-Pardo, Tabunan, San Nicolas Proper, Ermita, Tagba-o, Agsungot, Inayawan, Babag, Bonbon, Sinsin, Paril, Capitol Site, Cambinocot, Quiot, Labangon, Talamban, Sambag 1, Tisa ug Banilad.
Matud ni Lao nga kini ang ikaupat nga batch sa mga tanod nga ilang gihatagan og honorarium sa tag P4,000 matag buwan karong tuiga.
Adunay mga barangay ang gipatawag sa COSAP aron hisgutan ang buwan sa Marso nga honorarium sanglit dunay mga nasuspenso tungod kay walay payroll nga giuban.
Samtang ang Office of the Provincial Agriculturist mohatag sab sa binuwan nga incentive nga tag P2,000 sa mga fish wardens o bantay dagat.
Si Queenielen Pasaje, Agricultural Technologist sa OPA, niingon nga adunay 118 ka bantay dagat gikan sa nagkadaiyang lungsod ang makadawat sa maong incentive.
Ang bantay dagat kauban sa kapolisan ang modakop sa mga ilegal nga mananagat.
Karong katapusang semana sa Mayo mopahigayon ang OPA og Provincial Folk Summit ug kini gilauman nga salmutan sa mga mananagat gikan sa mga lungsod atol kini sa pagsaulog sa Month of the Ocean. (Erly Ann Alcontin, Myca Mae Gabato ug Caren Abing, CNU Interns/GMR)(BANAT NEWS)
- Latest
