Pogoy duna nay hulga

CEBU, Philippines – Nakadawat diay og pagpanghulga sa personal nga kinabuhi ang gipusil patay nga polis niadtong Martes nga si PO1 Kenneth Pogoy sa may dalan M.J Cuenco, Dakbayan sa Sugbo.

Ang direktor sa Cebu City Police Office nga si PSSupt. Joel Doria mitataw nga gawas sa personal, dili nila buhian ang anggulo nga work related ang maong krimen.

Gibutyag sa hepe sa CCPO-Investigation, Detection and Management Branch nga si PSupt. Ryan Devaras nga mitug-an ang pamilya sa biktima kabahin sa pagpanghulga apan ilang gitataw nga wala kini kalabotan sa iyang trabaho isip polis.

Giingong ilang ipaubos og forensic examination ang cellphone sa biktima aron masuta kon kinsa ang nanghulga niini.

Si Pogoy usa ka kanhi operatiba sa Cebu City Police Station 1 kon Parian Police Station ug niadtong Agosto 2017, gibalhin sa Police Regional Office-Autonomous Region of Muslim Mindanao (PRO-ARMM).

Nasayran nga gikan sa hearing sa kasong ilegal nga drugas si Pogoy niadtong Martes sa Cebu City Hall of Justice sa Qimonda  Bldg. ug paingon na unta mopauli sa Barangay Ermita apan sa may MJ Cuenco Ave., gipusil kini sa duha ka wa pa mailhing mamumuno nga nag-angkasay og motorsiklo.

Dugang ni Devaras nga base sa mga nakuha sa CCTV sa lugar, pagkahuman og pusil sa gunmen, mi U-turn kini diin ang usa nagsul-ob og sky blue nga kolor sa senina.

"Among i-back track ang route sa biktima basin og didto pa lang daan sa Qimonda, gisundan na ni." matud ni Devaras.

Ipa-enhance pa sa mga imbestigador ang nakuhang CCTV aron maklaro ang panagway sa mga mamumuno.

Giingong nakabawos pa si Pogoy sa mipatay kaniya gamit ang iyang kalibre .9mm service firearm human nakuha sa Scene of the Crime Operatives ang kabhang sa maong pusil.

Gideklara nga patay sa tambalanan si Pogoy gumikan sa mga naangkon niining samad pinusilan sa nagkadaiyang parte sa iyang lawas. (/DILT)(BANAT NEWS)