Mananga Bridge 3 ayuhon

CEBU, Philippines — Gipaabot nga makasinati og kahuot sa dalan ang atubangan nga bahin sa Talisay City Hall kung sugdan na sa pagtrabaho ang Mananga Bridge 3 sa Department of Public Works and Highways sugod sa Abril 27 nga molanat og duha ka buwan.

Kini ang gitug-an sa traffic czar sa Probinsiya sa Sugbo nga si Jonathan “Joy” Tumulak.

Matud ni Tumulak nga proyekto sa DPWH-7 ang rehabilitation ug repair sa Mananga Bridge 3 ug nakig-alayon kini sa ilang buhatan hinungdan nga ila na karon giawhag ang mga biyahedor nga kinahanglan mobiyahe dili panahon sa peak hours aron malikayan nga madelatar ang ilang mga kalihukan.

Sumala pa ni Tumulak nga sirad-an ang usa ka lane sa taytayan padulong sa Cebu City ug himoon nilang alternate nga dalan ang padulong sa habagatan nga bahin diin bahinon kini nila sa pagpagamit ilabi na panahon sa peak hours.

Gitug-an ni Tumulak nga ang 3-lanes nga dalan himoon nilang 2-lanes padulong sa Siyudad sa Sugbo sa buntag gikan sa alas 5 ngadto sa alas 9, ug 2-lanes padulong sa habagatan sa alas 5 sa hapon hangtud sa gabii diin mao ang peak hours.

Gibutyag ni Tumulak nga makamugna gyud og trapik ang maong proyekto hinungdan nga giawhag nila ang mobiyahe ilabi na kadtong mosakay pa og eroplano sa airport nga sayuhon gyud ang ilang mga biyahe aron dili mabiyaan. (BANAT NEWS)