Delute gidepensahan sa mga supporters

CEBU, Philippines — Nasagmuyo si Atty. Reymelio “Dodong” Delute, kandidato pagka kapitan sa Barangay Basak-San Nicolas sa pasangil ni Cebu City Mayor Tomas Osmeña nga nangilkil siya sa mga vendors.

Si Delute gisalikway ni Osmeña sa Bando Osmeña Pundok Kauswagan (BO-PK) tungod sa matud pa sa mayor pag-organisa niini sa mga vendors ug nga usa kini sa iyang pagpangwarta.

Matud ni Delute, nananghid siya kang Osmeña kabahin niini aron makatabang sa iyang kandidatora ug giangkon niya nga nakahilak siya sa maong pasangil tungod kay di kini tinuod. Sumala pang Delute, madawat  niya ang pagsalikway kaniya sa BOPK apan di ang maong pasangil ug nasakitan siya niini.

Sa presscon kagahapon, kauban ni Delute ang iyang mga kandidato sa pagka konsehal, mga dumadapig ug lakip na pipila ka mga vendors.  Matud ni Norma Burlas, kagawad sa Barangay Sumon, lungsod sa Tuburan ug kanhi kapitan sa maong barangay, taphaw ra kaayo ang pasangil sa mayor ngadto ni Delute.

Matud niya nahimong kagawad sa ilang barangay sa Tuburan kaniadto si Delute sulod sa tulo ka termino apan wa kini sukad namalit og boto.

Samtang usa ka Myrna Romero alyas Ka Magda, nga miangkong kanhi sakop sa New Peoples Army sa Sugbo kaniadto mipamatuod nga di kurakot nga politiko si Delute ug kini pa ang mikumbinsir kaniya aron pagbalik sa sabakan sa balaod.

“Ako siguroy mopatay niya (Delute) og gahimo pa siya’g salaod kay mao kanay silot sa among organisasyon sa mga tawong corrupt,” matud ni Romero.

Samtang ang vendor nga si Miranda Peralta, 39, miingon nga naguol sila sa pasangil ngadto kang Delute tungod kay di kini tinuod ug matinabangon pa gani kini kanila.

Si Delute miangkong dako kaayo’g epekto sa iyang pagdagan ang maong isyu kay namansahan ang iyang pagkatawo ilabi na nga gikan kini sa mayor.

Apan iyang paninguhaon nga mapresentar niya ang iyang kaso ngadto sa mga Basakanon aron sila na maoy mohukom kaniya sa piniliay. - Erly Ann Alcontin, Mary Rose S. Sagarino, Niña Mae P. Salvacion, ug Bernadette Itang, CNU ug PIT Interns (BANAT NEWS)