Dialysis center tukuron sa Mandaue

CEBU, Philippines – Makabaton na ang kagamhanan sa Dakbayan sa Mandaue og kaugalingong dialysis machine nunot sa kaugmaran sa dialysis center sa dakbayan.

Ang Department of Health maoy gikuhaan sa gahin nga mokabat sa P30.5 milyones alang sa tukuron nga building ug walo ka dialysis machines.

Matud ni Mandaue City Health Officer Edna Seno nga ang katukuran sa sentro dako kaayo og ikatabang sa mga pasyente nga nanginahanglan niini.

Si Mayor Gabriel Luis “Luigi” Quisumbing niingon nga ang unom ka dialysis machines iyang igahin alang gyud sa mga pasyente nga Mandauehanon samtang ang duha o usa ka machine ang magamit sa mga pasyente gikan sa laing lugar.

Gitataw ni Quisumbing nga nagkadaghan ang panginahanglan sa mga dialysis machines sa naghambin og sakit nga diabetes nga ang kadaghanan adto sa mga pribadong tambalanan nga dako ang bayranan.

Dugang ni Quisumbing nga pahimoan pa og pagtuon sa mga sakop sa konseho ang paghan-ay sa mga guidelines sa pagpagamit sa maong kahimanan.

Si Quisumbing niingon nga magsugod ang kaugmaran sa building sa mosunod nga buwan ug gilauman nga mahuman ug hingpit nga kapahimuslan sa dili pa matapos karong tuiga. (/GMR)(BANAT NEWS)