Mga miduso og COC nagdasok sa Cebu City Comelec

CEBU, Philippines – Nagdasok kagahapon diha sa buhatan sa Comelec sa dakbayan sa Sugbo ang mga kandidato sa Sangguniang Kabataan (SK) ug barangay kinsa miduso sa ilang Certificate of Candidacy (COC).

Kagahapon mao’y ikalimang adlaw sa pagduso sa COC sa mga magpapiling opisyal sa barangay ug SK.  Base sa consolidated report mga alas 6:00 pasado  kagabii adunay 1,376 ka kanditato gikan sa north ug south district ang miduso og COC.

Sa north district adunay 377 ka kandidato sa Sangguniang Barangay diin 147 niini ang magpapili  sa punong barangay o kapitan, 230 sa pagka-konsehal sa barangay ug 240 sa SK (chairperson ug SK councilors).

Samtang sa south district adunay 759 ka kandidato diin 329 niini ang sa SB (kapitan ug kagawad) ug 430 sa SK (chairperson ug SK councilor).

Si Atty. Anna Fleur Gujilde, election officer sa south district nagkanayon nga tungod sa kadaghan sa tawo sa ikalimang adlaw sa filing napuno gyud ang ilang opisina.

Matud ni Gujilde nga kinahanglang siguraduhon sa mga kandidato nga kompleto na ang tanang dokumento aron hapsay ang filing.

Si Cenon Bacus, taga Barangay San Nicolas, dakbayan sa Sugbo kuyog sa iyang mga supporter  miduso sa iyang COC tungod kay mituo siya nga swerte ang numero  nga “8”.

Mihangyo si Gujilde sa mga molansad nga dili lang unta magdala og daghan kaayo nga supporter sa buhatan aron hapsay   ang ilang buhatan diin uban sa mga supporter magtapok na diha daplin sa karsada.

Mipahimangno usab ang COMELEC nga gidili ang premature campaign.

Gitugotan lamang ang mga kandidato sa pangampanya panahon lamang sa campaign period nga magsugod sa Mayo 4 ngadto sa 12 ug sa Mayo 14 mao na ang adlaw sa piniliay.  (CNU Intern ug Jade Aura Mojado, PIT Intern/BDB)(BANAT NEWS)