Traysikol gidumbol sa mini-bus, 3 angol
CEBU, Philippines — Nangaangol ang drayber sa traysikol ug ang duha ka lalaking pasahero human nabanggaan sa usa ka mini-bus nga giingong nisuway og overtake sa lain pang gisundan nga sakyanan sa nasudnong dalan sa Sitio Katugasan, Barangay Perrelos, Dakbayan sa Carcar niadtong Domingo sa gabii.
Ang drayber giila sa Carcar Police Station nga si Isidro Alison, 49-anyos, residente sa Barangay Poblacion 1 sa maong dakbayan.
Giila ang mga pasahero nga sila si Daryl Ramos, 31, taga Valladolid, Carcar City ug si Albert Lantape, 42, taga Lungsod sa San Fernando.
Samtang ang nagmaneho sa Isuzu mini-bus giila nga si Romeo Destacamento, 47, nagpuyo sa Sitio San Isidro, Perrelos.
Sumala pa ni Police Officer 2 Joe Marie Villar sa Carcar City Police Station nga gikan sa Lungsod sa Sibonga paingon sa Dakbayan sa Sugbo ang minibus nga adunay plakang GXW 456 samtang kasugat niini ang traysikol ni Alison nga paingon Carcar City proper gikan sa maong sitio.
Giingong nisuway og overtake ang minibus sa usa ka lain pa nga sakyanan ug nasaghiran ang traysikol hinungdan nga nalimbuwad kini sa karsada.
Dali nga gidala sa Carcar Provincial Hospital si Alison ug ang duha ka pasahero kinsa naka-angkon og mga bali sa ubang parte sa ilang lawas.
Anaa na sa luwas nga kahimtang ang tulo ug kasamtangang nagpaalim sa maong tambalanan samtang ang drayber sa mini-bus nga si Destacamento gitanggong sa Carcar City Police Station aron mapasakaan og kasong reckless imprudence resulting to multiple physical injuies. (BANAT NEWS)
- Latest
