Kriminal ni Konsehal Abella wala pa mailhi

CEBU, Philippines — Gipadayag sa Cebu Provincial Police Office director Senior Superintendent Edgar Alan Okubo nga manghipos usab sila og mga dugang detalye nga posibleng makatabang sa pagsulbad sa pagpusil patay sa barangay konsehal sa barangay San Isidro, lungsod sa San Fernando nga si Neil Abella kinsa gituohang nalambigit usab sa ginadiling drugas kaniadto.

“We will continue to gather information na ma-i-share natin dun sa Cebu City para kung meron man magkaroon ng references sa Cebu City”, matud ni Okubo.

Gibutyag ni Okubo nga ilang subayon kon aduna ba’y nakabangi sa politika si Abella ilabi na nga nagdulong na ang piniliay sa barangay karong Mayo 21.

Giingong ilaha usab nga imbestigahon kon may kalabotan ba sa pagkalambigit ni Abella sa drugas kaniadto.

Kahinumduman nga si Abella gipusil patay diha sa parking lot sa usa ka burger store diha sa may Mango Avenue, dakbayan sa Sugbo samtang nagpaatras kini sa iyang sakyanan aron unta mobiya na sa maong lugar.

Namatay diha-diha ang biktima samtang nangaangol ang kauban niini sa maong sakyanan nga sila si Enriclint Alesna, 41 ug Mabel Noel, 43.

Hangtud karon wala pa mailhi ang kriminal sa maong pagpamusil.

Mahinumduman usab nga ang hepe sa lungsod sa San Fernando Police Station nga si Chief Inspector Adrian Nalua mibutyag nga naa sa ilang listahan sa mga durugista si Abella apan nitahan na kini sa polis niadtong Nobyimbre 2016  ug giingong mihatag kini og impormasyon kabahin sa mga durugista ngadto sa Campo Crame.

Human niini, giingong talagsaon na lang kini nga makita diha sa ilang lugar apan wala usab kini misumbong ngadto sa mga polis nga adunay nadawat nga mga hulga sa iyang kinabuhi. (BANAT NEWS)