Reward money ihatag karong adlawa

CEBU, Philippines — Karong adlawa pormal nga ihatag ang P300 mil nga ganti ngadto sa Police Regional Office-7 alang sa pagsulbad sa kaso sa pagpamanhig patay sa kanhi kapitan sa Barangay Ermita nga si Felicisimo ‘Imok’ Rupinta niadtong Nobiyembre 23, 2017. “Coming up with the 300 thousand pesos is no joke. There are a lot of people who donated like giving a little and then such time we came up with the amount,” matud pa ni Cebu City Councilor Joel Garganera.

Ang maong kwarta magsilbing ganti alang sa mga tawo nga mitabang sa mga polis sa pagsulbad sa kaso ni Rupinta.

“During the incident of the ambush of Imok we have no lead so we encouraged those who acknowledged the case, those who witnessed the ambush to come out and helped the police. That is why we put up the reward,” dugang niya.

Si PRO-7 Director, Chief Supt.  Robert Quenery miingon nga makatabang gyud sa dinaliang pagsulbad sa kaso ang reward money. “The putting up of reward money in cases like this may motivate witnesses to cooperate in the successful solution of cases,” matud pang Quenery.

Nasayran nga gibanhigan si Rupinta uban sa iyang kapuyo nga si Jocelyn Mendoza didto sa Sitio Simborio, Barangay  Tayud, lungsod sa Liloan niadtong Nobiyembre 23 ug pagkahuman sa tulo ka adlaw nadakpan ang gituohang hitman nga si Jimmy Largo kinsa nakuha sa Closed Circuit Television sa usa ka tindahan duol sa nahitaboan sa krimen samtang nagpaabot nga moagi si Rupinta ug Mendoza.

Paglabay sa lima ka adlaw nadakpan usab ang kauban niini nga si Jordan Gera. Sa dagan sa imbestigasyon, usa ka saksi ang mitumbok ni Winefredo Miro, ang City Market Administrator sa siyudad nga usa sa nagpaluyo sa maong pagpatay ug giingong adunay pay mastermind kinsa hangtod karon wala pa mabutyag. Si Miro ug silang Largo ug Gera kusganong mihimakak sa maong krimen. Ivory Pauline Escarro,CNU Intern (BANAT NEWS)