Asawa ni Alicaway nidangop sa NBI
CEBU, Philippines — Nidangop sa National Bureau of Investigation (NBI-7) ang asawa sa napatay nga konsehal sa Lungsod sa San Fernando nga si Alexander Alicaway.
Si Maria Victoria niadto sa NBI-7 kagahapon aron mohangyo og “parallel investigation” kalabot sa kamatayon sa iyang bana.
Matud ni Alicaway nga nalangayan siya sa imbestigasyon sa lokal nga kapolisan ug gani wala siyay nakita nga “progress” sa kasulbaran sa kamatayon sa konsehal halos usa ka buwan na ang nilabay. Si Alicaway mismo ang nagsige og balik-balik sa police station sa San Fernando aron i-follow up ang kalambuan sa imbestigasyon.
Nipadayag usab siya og kahiubos sanglit walay police assistance atol sa paglubong sa iyang bana.
Si Atty. Dominador Cimafranca, NBI-7 assistant regional director, nagkanayon nga kung pormal na nga makaduso og “request investigation” magsugod na sila og lihok pinaagi sa pag-assign og special agent.
Si Alexander Alicaway gipatay sa riding-in-tandem samtang naglakaw padulong sa legislative building sa San Fernando niadtong Marso.
Matud ni Senior Insp. Adrian Nalua nga base sa ilang imbestigasyon adunay kalambigitan sa trabaho ang pagpatay sa konsehal.
Ang imbestigasyon gisumiter nila sa Special Investigation Task Group sa Police Regional Office-7 paglikay sa pagduda nga ma-impluwensyahan ang ilang imbestigasyon.
Kalabot sa paglubong sa konsehal nga walay police assistance, matud ni Nalua nga walay request ang pamilya sa konsehal.
Gihangop hinoon sa San Fernando Police ang pagdangop ni Maria Victoria sa NBI. (GMR) (BANAT NEWS)
- Latest
