2 mil kilo basura naugkat sa Sumilon

CEBU, Philippines — Niabot sa 2,000 ka kilo sa mga basura ang nakuha gikan sa Isla sa Sumilon sa unang adlaw sa clean-up drive kagahapon.

Ang mga basura naglangkub sa mga plastik, ligid, botelya ug uban pa gikan sa baybayon apil na sa ilawom sa dagat sa isla nga nakuha sa mga volunteers ug mga residente sa Oslob.

Ang maong clean-up drive subay kini sa rehabilitation sa isla ug paghatag og pahuway gikan sa mga turista.

Sugod kagahapon, Abril 10, hangtud 16 ang pagpasirado sa sandbar sa Sumilon Island alang sa rehabilitation ug paglimpyo sa isla.

Gidayeg sa Provincial Tourism Office (PTO) ang gihimo sa lokal nga kagamhanan sa Lungsod sa Oslob sa pagpasirado sa sandbar sa Sumilon Island.

Matud ni Joselito “Boboi” Costas, ang pangulo sa PTO, nga maayo nga lakang ang gihimo sa munisipyo sa Oslob.

“Good move of the local government unit, they should be commended for that especially the mayor,” matud ni Costas.

Lakip sa iyang gidayeg ang pagka-aktibo sa mayor sa Lungsod sa Sta. Fe, Isla sa Bantayan pagpanalipod sa baybayon atol sa Semana Santa diin liboan ka turista ang nibisita.

Si Costas niawhag sa ubang LGUs nga mosunod sa lakang sa Oslob.

“Dili na ta magpaabot nga ang national government nga they will be looking for Cebu. And other LGUS should follow unta,” matud ni Costas.

Matud niya nga ang lokal nga kagamhanan sa Lungsod sa Moalboal nihangyo sab sa ilang buhatan nga mopahigayon og “carrying capacity” o pagtan-aw sa baybayon sa lungsod nga dagsaonon sab sa mga turista.

Samtang sa gipaabot nga pagdagsa sa mga turista sa Lalawigan sa Sugbo nunot sa pagpasirado sa Boracay Island, giawhag sa PTO ang mga turista nga mosuway og “homestay program” isip alternatibong hotels.

Sumala pa ni Costas nga kun ubay-ubay na ang mga turista nga mobisita sa Lalawigan sa Sugbo, posibleng magkuwang ang mga accommodation establishments nga kapuy-an sa mga bisita. (GMR)  (BANAT NEWS)