Tour guide hayan mawad-an og trabaho
CEBU, Philippines — Kung mapamatud-an nga nanghinol gyud sa usa ka turista ang usa ka tour guide sa Moalboal niadtong Domingo, angay kining tangtangon sa trabaho sumala sa pangulo sa Provincial Tourism Officer.
“We don’t have a place like that para sa ing-ana nga klase nga guide,” matud ni Joselito “Boboi” Costas.
Matud ni Costas nga anaa ra sa local government unit (LGU) o sa tag-iya sa resort nga nikuha sa tourist guide kun unsay himoon nga silot kun mapamatud-an ang pasangil sa usa ka French.
Hinoon ang langyaw dili modayon sa pagpasaka og kaso batok sa tour guide.
Si Costas nagkanayon nga kini ang labing unang higayon nga nasayud sila sa samang insidente sa tibuok Lalawigan sa Sugbo apan sumala pa posibleng aduna nay nahitabo niini kaniadto nga wala lang na-report.
Nunot niini girekomendar ni Costas nga i-revisit o tan-awon sa mga LGUs ang training sa ilang mga local guides.
“If you are guide you should follow protocols, you have to respect the tourist, if physical ang hisgutan dili ka dapat intimate sa tourist,” matud ni Costas.
Si Costas nagkanayon nga wala pay balaud nga nag-regulate sa mga local tour guides sa probinsiya.
“I’m recommending sa Provincial Board nga tan-awon gyud unta ni ang pag-regulate sa tour guides and tour operators,” matud ni Costas. (GMR) (BANAT NEWS)
- Latest
