Nakapatay sa rambol sa gang nasikop

CEBU, Philippines — Nagtingkagol sa Police Station 1 sa Mandaue City Police Office ang pangulo sa gang nga Fam kinsa gituohang nakapusil patay sa usa ka 12-anyos nga babaye ug niangol sa 17-anyos nga lalaki atol sa frat war niadtong Lunes sa Liong, Barangay Alang-Alang.

Ang niangkon sa tira pasagad nga pagpamusil si Reynaldo Cabatingan, 23, taga Sitio Calderohan, Barangay Casuntingan ug nipatay kang  Sonny Ricania alyas Tisay kinsa naigo sa ulo.

Si Cabatingan niangkon nga pangulo sa grupong Oy Diamond nga nakigrambol sa laing lima ka grupo sama sa Thugs ug uban pa sa likod nga bahin sa usa ka mall sa Barangay Alang-Alang human sa binaharay pinaagi sa social media ug text nga magkarambola sila kung mag-abot.

Dali unta nga nisibat si Cabatingan padulong sa ilang hide-out sa usa ka abandonadong balay sa Cansaga, Consolacion apan nasikop sa manhunt operation sa kapolisan ug na-rescue ang laing napulo ka menor de edad nga kauban niini.

Sa maong manhunt operation nasikop sila si James Manto, 18, taga Maguikay kinsa maoy gituohan nga gihuwaman ni Cabatingan sa armas, Benedicto Dayuga, 37, taga Paknaan kinsa nakuhaan sa armas nga gibilin sa pag-umangkon niini ug maoy nakapatay ni Ricania ug laing nakuhaan og kagamitan sa pagsuyop nga sila si Junrey Alfornon, 32, taga Cansaga ug Luciano Salimbot, 22, taga Pulpogan, Consolacion.

Matud ni Police Chief Inspector Aldrin Villacampa, hepe sa Police Station 1 sa MCPO, nga si Cabatingan adunay kanhi kaso nga pagpangawat.

Nunot sa maong insidente, nagpahimutang si Villacampa og mga polis nga wala mag-uniporme ilabi na sa mga lugar nga sagad tapukan sa mga batan-on.

Pakigtagboan sab ni Villacampa ang mga pangulo sa mga gang lakip ang mga fraternities aron tukion ug hatagan ug kasulbaran nga mahunong na ang bawos-bawos sa matag habig.

Sutaon usab sa kapolisan ang motor nga nakuha gikan sa mga dinakpan kung wala ba kini nagamit sa mga pagpanulis sa Dakbayan sa Mandaue.

Samtang si Dayuga sa iyang bahin hugot nga nihimakak nga kauban sila ni Cabatingan tungod kay wala siyay grupo ug wala siya magdahum nga ang gibutang sa iyang pag-umangkon sa ilang butanganan sa ilang senina mao diay ang armas nga gigamit sa pagpamusil nga nikalas sa menor de edad ug niangol sa laing batan-on.

Ang pangangkon ni Dayuga gidasunan ni Cabatingan nga wala kini labot sa nahitabong krimen.

Apan si Villacampa nipadayag nga adto na lang sa korte modepensa si Dayuga.

Tan-awon sab sa kapolisan kung unsay mga lapso sa mga ginikanan sa bata nga namatay nga posibleng mapasaka usab nga kaso niini samtang murder ang ilang ipasaka nga kaso batok ni Cabatingan. (GMR) (BANAT NEWS)