Campus tour batok drugas ipahigayon
CEBU, Philippines — Sa tinguha nga wala nay malambigit nga batan-on sa ilegal nga drugas sa Lalawigan sa Sugbo, ang Cebu Provincial Anti-Drug Abuse Office (CPADAO) mopahigayon og campus tour sa mga pribado ug pangpublikong eswkelahan sa probinsiya.
Ang “Truth About Drugs” sa CPADAO subay kini sa Sugbo Kontra Droga nga programa sa maong buhatan.
Matud ni Ivy Durano-Meca, pangulo sa CPADAO, nga tinguha nila nga mapadayon ang pag-edukar sa kabatan-onan kalabot sa kadaut nga dala sa drugas.
Matud niya nga ang “Truth About Drugs” nga programa ila kining iimplementar sa buwan sa Hunyo o sa pagbukas balik sa klase.
Gawas sa mga school organizations, tinguha usab sa CPADAO nga awhagon ang ubang grupo sa mga batan-on sama sa gangs.
“I believe they can help us with their leadership sa pag-fight against drugs,” matud ni Meca.
Matud niya nga sa pagkakaron ang aktibo nga nakig-alayon sa CPADAO mao ang mga anaa sa eskwelahan, out of school youth ug religious sector.
Hinoon nagsugod na sila og suroy sa mga private schools niadto pang buwan sa Enero apan ang hingpit nga implementasyon sa programa magsugod sa pagbukas sa klase. (BANAT NEWS)
- Latest
