Lahug butangan og dugang fire truck
CEBU, Philippines — Ang kadagkoan sa Cebu City Fire Station naghangyo karon sa kagamhanan sa dakbayan sa Sugbo nga tabangan sila nga makaangkon og usa ka fire truck aron idestino nila sa Barangay Lahug.
Si Konsehal Mary Ann Delos Santos, nga taga Lahug, nipresentar sa suwat sa kabomberohan ngadto sa kaubanan niya nga konsehal sa dakbayan.
Gitun-an pa karon kon ang kagamhanan sa siyudad makagahin ba og budget nga magamit pagpalit og bag-ong fire truck alang sa fire station nga anaa magbase sa Barangay Lahug.
Pagkakaron, usa ra ka fire truck ang nagbase sa Barangay Lahug nga makaresponde dayon kon may sunog nga moulbo sa barangay ingon man sa silingan nga mga dapit.
Ang usa ka dako ug bag-ong fire truck mokantidad gani og mga P20 milyones, apil na ang iyang kahimanan. Dinhi sa dakbayan sa Sugbo, gidestinohan og mga fire station ang lainlaing dapit aron nga marespondehan dayon ang mga moulbo nga sunog.
Matud ni Fire Marshall Noel Nelson Ababon nga naglaum usab sila nga ang dakbayan sa Sugbo kagahinan og dugang fire trucks kon may dugang pamaliton ang Department of Interior and Local Government (DILG) alang sa lainlaing local government units.
Daghan sa mga fire trucks nga gidumala karon sa Cebu City Fire Station mga gidonar sa lainlaing nasud sa kalibutan, sama sa Japan, nga adunay sister-city relation sa siyudad. (BANAT NEWS)
- Latest
