Koreano biktima sa Salisi

CEBU, Philippines — Nahanaw ang mokabat $700  ug P20,000 nga salapi sa usa ka Koreano nga biktima sa wala hiilhing grupo sa Salisi Gang sulod sa coffee shop sa Barangay Mactan, Dakbayan sa Lapu-Lapu alas 2 pasado sa niaging Biyernes sa hapon.

Si Tourism Police chief Richard Oliver sa Lapu-Lapu City Police Office (LLCPO) niila sa biktima nga si Kim Keon Ho, 26, taga Incheon, South Korea.

Matud ni Oliver nga nisumbong ang biktima nga nawagtang ang iyang sling bag sulod sa coffee shop sa Mactan Newtown.

Kauban sa biktima ang walo pa ka Koreano kuyog sa hinigugma niini.

Gitug-an sa biktima nga gibutang ang iyang sling bag sa lingkuranan ug namatikdan nga adunay laing mga lalaki ang nisulod nga nagpatuo nga adunay gipangita ug nagdali sab sa pagpanggawas.

Dugang pa ni Oliverio nga nibarug ang biktima sa gilingkuran ug nigawas sa pagtubag sa tawag sa iyang cellphone.

Sa pagbalik pa niini maoy nadiskubrehan nga nahanaw na sa iyang gibutangan ang sling bag ug gituohan nga gisakiyo kini sa wala pa hiilhing kawatan.

Si Oliver niingon nga gihimo nila ang pagpangayo og tabang sa tagdumala sa coffee shop sa pag-ila sa mga kawatan. (GMR) (BANAT NEWS)