Babaye gipatay, anak napagan
CEBU, Philippines — Usa ka inahan ang gipusil patay sa wa pa mailhing lalaki samtang samdan ang iyang anak nga 3-anyos nga iyang gikatupad og tulog diha sa ilang balay nga nahimutang sa Barangay Hipodromo ning dakbayan sa Sugbo.
Ang insidente nahitabo alas 12:45 sa Sabado, sa Sitio Sto. Niño Rail Site diin magpuyo ang biktimang si Sofia Manto, 44, ug ang iyang babayeng anak.
Base sa imbestigasyon sa Cebu City Police Office Homicide Section pinaagi ni SPO3 Rommel Bancog gituohang natulog ang biktima dihang nakasulod sa balay ang mamumuno.
Wala na madala sa emergency response team sa ospital si Manto kinsa nakaangkon og samad sa tiyan ug dughan.
Samtang ang anak niini nga nasamdan sa paa gidali pagdala sa Cebu City Medical Center ug luwas na ang kahimtang. Nakuha sa crime scene ang duha ka basiyo sa kalibre .45 nga pusil.
Si Bancog miingon, nga sa ilang pakighinabi sa anak niini sa unang kapuyo, aduna na’y laing kapuyo ang biktima nga napriso na pud. Apan dili pa nila masuta og kung naa ba kini koneksyon. Wala pa usab nila masuta og kinsa ang mamumuno apan dako ang pagduda sa mga imbestigador nga taga diha ra pud ang suspetsado.
Sigon ni Bancog, motibo nga personal grudge ang ilang gisunod samtang nagpaabot sila sa reports gikan sa Mabolo Police Station.
“So far sa pagkakaron wala pa’y manug-an pa, possible nga taga diha gyud to, so possible naa ra unya molutaw nga ngalan…imposible nga gisundan kay diha ra gud sa ila balay, possible nga personal kay babaye (ang biktima),” sigon pa ni Bancog. (IBM)(BANAT NEWS)
- Latest
