Patay’ng lawas sa lalake napalgan

CEBU, Philippines — Usa ka patay’ng lawas sa wala mailhing lalake ang napalgang naglutaw-lutaw diha sa kadagatan duol sa South Coastal Road Viaduct habig sa dakbayan sa Sugbo kagahapon sa buntag

Si Senior Police Officer 1 Winston Ybañez imbestigador sa Cebu City Police Office (CCPO) homicide section mibutyag nga usa ka polis kinsa diha sa maong lugar aron mopalit og isda ang ni-report kanila human siya gipahibawo sa mga mananagat nga unang nakakita sa maong lalake  diha sa kadagatan.

Giingong ang nahisgutang polis nga mi-report mihangyo sa mga mananagat nga ang maong patay nga lawas dalhon diha sa Pasil fish port aron dali kini nga makuha.

Matud ni Ybañez nga ang patay’ng lawas adunay garas sa iyang kilay ug mata nga gituohang tungod sa paglutaw-lutaw  niini diha sa dagat.

Ang maong patay’ng  lawas gibana-bana nga anaa sa 35 ngadto sa 40-anyos ang pangedaron, nagsul-ob og maong shorts ug walay gisul-ob nga t-shirt.

Gituohan sa mga polis nga bag-o pang naglutaw diha sa dagat ang maong lalake sanglit wala pa man moburot ang lawas niini ug presko pa usab ang dugo nga naa sa kilay ug dunggan niini.

Ang maong patay’ng lawas ipaubos sa autopsy sa kapolisan pagsuta sa hinungdan sa kamatayon niini. (BDB) (BANAT NEWS)