Duha ka menor “gipasuyop og shabu”

CEBU, Philippines — Duha ka menor de edad kinsa nagpanuigon og 11 ug 12-anyos ug giingong mga miyembro sa Alpha Kappa Rho (AKRHO) fraternity mireklamong gipugos sila og pasuyop og shabu sa ilang mga kaubang hingkod na og pangidaron diha sa Sitio Ilihan, Barangay Simala, lungsod sa Sibonga kagahapon sa buntag.

Ang giingong mipugos og pasuyop og shabu sa mga bata giila sa kapolisan sa lungsod   nga sila si Michael Olanda, 20, Armel Cuizon 22 ug si Marvin Aliponga 19, parehong mga residente sa barangay Poblacion, Sibonga. Laing usa nga giingong kauban sa nahisgutang mga suspetsado nga si Archel Lambayan, 19, residente sa Barangay Simala ang nakaikyas ug padayon kining gipangita sa kapolisan.

Si Senior Inspector Stephen Amamag-id, hepe sa Sibonga Police Station mibutyag nga  ang duha ka bata misumbong diha sa ilang buhatan niadtong Miyerkules sa gabii nga gipugos sila og pasuyop og shabu sa ilang mga kauban sa fraternity.

Giingong ang duha ka menor gipaapil sa tapok-tapok sa maong grupo diin niadtong higayona nag-inom diha sa baybayon ug  ang duha ka menor gipugos og painom og ilimnong makahubog nga gibutangan og mga bato-bato nga puti.

Apan giingong namalibad ang duha ka menor ug human niini gidala sila ngadto sa balay ni Lambayan ug nakagamit gyud og ginadiling drugas ang mga biktima tungod kay gipugos sila og pasuyop sa mga suspetsado.

Ang direktor sa Cebu Provincial Police Office Senior Superintendent Edgar Alan Okubo nagkanayon nga mipagawas na siya og direktiba ngadto sa ilang Public-Community Relations (PCR) nga lakip kining hisgotan sa ilang mga ipahigayong mga seminar ngadto sa mga barangay ug eskwelahan.

Dugang niya nga iyang patun-an ang maong fraternity kon angay na ba kining i-disband o bungkagon nunot sa negatibong impluwensya niini ngadto sa mga kabatan-onan. (BDB) (BANAT NEWS)