‘Rugby boys’ gipasagdan lang

CEBU, Philippines — Ang mga bata nga gianggaan og “rugby boys” nga sagad makita nga maghingos og rugby ug vulcaseal diha sa mga aseras, mitug-an nga sayon ra sila nga makapalit niini gikan sa nag-menudo pagbaligya sa maong produkto diha sa Barangay Ermita.

Kini maoy hinungdan nga si Konsehal Raymond Alvin Garcia miawhag sa kapolisan, sa Department of Social Welfare and Development (DSWD), sa Department of Social Welfare and Services (DSWS) sa dakbayan ug Cebu City Anti-Mendicancy Board pagsuta niining maong report.

Giawhag ni Konsehal Garcia ang maong mga ahensya sa kagamhanan sa pagsumiter og report ngadto sa Cebu City Council kabahin sa ilang pakisusi, samtang ang kapolisan giawhag nga dakpon ang mga tawo nga milapas sa balaod.

Ang Presidential Decree 1619, kun Volatile Substance Law, nagdili sa pagbaligya sa mga volatile substance sama sa rugby ug vulcaseal ngadto sa mga bata, ilabi na nga kini nahibaw-an na nga giabusohan sa mga menor de-edad.

Dinhi sa dakbayan sa Sugbo, daghang kabataan nga anaa mangligdas sa aseras makita nga walay kahadlok nga magpakita nga sila maghingos sa silopin nga dunay sulod nga rugby ug vulcaseal.

Gusto ni Konsehal Garcia nga masayod kon ngano nga bisan og adunay Anti-Mendicancy Task Force ang dakbayan sa Sugbo apan makita nga gipasagdan ra ang mga libudsuroy nga kabataan, apil ang mga ‘rugby boys’ nga anaa sa mga aseras.

Nabantayan nga apil sa mga libudsuroy nga mohingos og mga rugby ug vulcaseal, mga babaye nga nag-edad pa og pito ngadto sa 10 ka tuig. (BANAT NEWS)