Rizal Library tabangan sa duha ka senador

CEBU, Philippines — Malipayon nga gi-anunsiyo ni Cebu City Mayor Tomas Osmeña nga sila si Senator Risa Hontiveros ug Senator Richard “Dick” Gordon pulos mipasalig nga motabang pag-renovate sa Dr. Jose Rizal Public Library nga nahimutang sa Osmeña Boulevard, dakbayan sa Sugbo.

Kahinumduman nga daghang mihangop sa gihimong lakang ni Osmeña pag-abli sa public library nga nag-operate 24/7 sugod niadtong adlaw’ng Biyernes isip study area sa mga tinun-an.

Gi-post ni Osmeña sa iyang official Facebook Page ang tabang nga gipasalig sa duha ka mga senador ug sigon sa mayor pinaagi niini ma-renovate na unya ang Sinulog Hall nga nahimutang ibabaw sa public library nga maka-akomodar og laing 200 ka mga tinun-an.

“With this support, we will be able to renovate the Sinulog Hall on top of the library, which can easily accommodate another 200 students. We will also be renovating other unused city-owned buildings and rooms around the city to serve as local study centers to give students an alternative to coffee shops,” tipik sa post sa Facebook post sa mayor.

Si Assistant City Administrator Annabeth Cuizon miingon dili lang ang public library ang nagkinahanglan og renovation apan ang tibuok building gyud sa Rizal Public Library ug museum.

Pipila sa mga angayan nga ayuhon ang atop nga daghan og buslot, comfort rooms, plumbing, electrical, kisame, ang sawog nga dunay mga liki ug buslot ug uban pa.

Midugang si Cuizon, ang public library duna say mga gikinahanglan nga i-renovate diin i-upgrade ang air conditioning unit, comfort rooms, computers ug mag-set up og dugang space alang sa study area ug audio-visual room nga duna nay P1 million fund gikan ni North District Representative Raul del Mar.  (BANAT NEWS)