Towing ug clamping ordinance sa Minglanilla
Kini human ang konseho sa maong lungsod nipanday na og ordinansa aron sa pag-clamp ingon man pagbira sa mga sakyanan nga pataka lang giparada. File
CEBU, Philippines — Madisiplina na unya ang mga motorista nga pataka lang og parking sa ilang mga sakyanan diha sa lungsod sa Minglanilla.
Kini human ang konseho sa maong lungsod nipanday na og ordinansa aron sa pag-clamp ingon man pagbira sa mga sakyanan nga pataka lang giparada.
Ang mga opisyales sa Minglanilla nipahigayon na og public hearing sa duha nila ka ordinansa nga gipanday.
Sa nasayran, ang lungsod sa Minglanilla naputos og pagsaway diha sa social media ug sa mainstream media gumikan sa kagrabe sa trapik sa ilang lugar.
Gani niadtong Disyembre 23 sa miaging tuig pwerte gyud nga kataas sa kutay sa trapiko sa maong lungsod nga niabot pa sa silingan nga siyudad sa Talisay tungod sa aksidente.
“An ordinance authorizing the traffic enforcers of Minglanilla to immobilize any motor vehicle violating parking restrictions and parking prohibitions as provided for by the traffic code of the municipality of Minglanilla and providing for its penalty,” tipik sa ordinansa.
Aduna’y multa nga usa ka libo ka pesos ang ma-clamp samtang ang ikaduhang ordinansa nga naghatag og gahom sa ilang traffic enforcers nga birahon ang sakyanan nga gipataka og parking ug pabayron og multa nga P2 mil ngadto sa P5 mil ang tag-iya.
Atol sa public hearing mipadayag og pagsupak ang pipila ka mga negosyante kay matud pa wala sila’y parkingan samtang may problema usab sila sa terminal sa mga traysikol ug mga habal–habal.
Gawas pa niana, idili na usab ang mga carwash daplin sa karsada nga nabantayang nagkaanam og kadaghan karon.
Ang kagamhanan sa lungsod sa Minglanilla nangita pa sa pagkakaron kun kinsa nga towing company ang ilang kuhaon. (BANATNEWS)
- Latest
