Pamilyang ong mohatag og ganti
Si Atty. Inocencio De La Cerna, abogado sa pamilyang Ong ug mga higala nipahibawo sa mga sakop sa media sa ilang mga lakang sa pag-awhag sa kapolisan nga makairog na ang imbestigasyon sa kasong pagpatay sa magsuong Neil Brian ug Nick Benzen Ong human sa dul-an duha na ka buwan nga wala pay napasaka nga kaso. Joy T. Torrejos
CEBU, Philippines — Nagtinguha karon ang pamilyang Ong nga mohatag og ganti sa makatudlo sa nagpatay sa magsuong seaman niadtong Enero 27 sa Punta Princesa, Dakbayan sa Sugbo.
Kini maoy gipahibawo sa abogado sa pamilya, Atty. Inocencio Dela Cerna, human dul-an na sa duha ka buwan nga wala pay napasakaan og kaso ang kapolisan.
Wala pa hinoon gibutyag ni Dela Cerna ang kantidad samtang nanawagan sila sa kapolisan nga kuhaan na og pamahayag ang mga testigos nga nakakita sa mga mamumuno sa wala pa pusila ang magsuong Neil Brian ug Nick Benzen Ong.
Giingong nag-inom pa og beer ang mamumuno sulod sa bar nga giimnan sa magsuong Ong sa wala pa unang gipusil si Nick.
Gigukod ni Neil ang mamumuno sa iyang manghud sa gawas hinungdan nga didto sab siya pusila.
Makigtagbo si Dela Cerna sa kadagkuan sa Police Regional Office-7 ug Cebu City Police Office aron masayran kung mopadayon pa sila sa imbestigasyon sa dili pa sila moduol og laing ahensiya.
Samtang gipadayag sa hepe sa Investigation, Detection and Management Branch, Supt. Ryan Devaras, nga aduna nay cartographic sketch sa duha ka mamumuno.
Matud ni Devaras nga segurado sila nga anaa pa sa Sugbo ang duha ka gun-for-hire nga maoy nitira sa duha.
Dugang pa niya nga bisan pa man nga wala na sa nasud ang inahan sa mga biktima sige gihapon ang komunikasyon niini sa mga imbestigador sa CCPO Homicide Section.
Gani ang inahan nga si Thelma Ong sa iyang sinuwat nga pamahayag nanghinaut nga matabangan siya sa pagpangita og hustisya alang sa iyang duha ka anak.
“Kun ugaling naa kamoy mga impormasyon nga makatabang sa pagpalambo sa among kaso, mamalihug kami sa pag-private message sa impormasyon didto sa “Justice for Neil & Nick Ong” Facebook page. Among buhaton ang tanan masiguro lang ang inyong seguridad,” matud ni Thelma.
Ugma ang kahigalaan sa magsuong Ong mopahigayon og indignation rally nga manukad sa St. Peter Chapel sa ala 1:00 sa hapon paingon sa Sacred Heart Church sa dalan Jakosalem alang sa Santos nga Misa dayun padulong sa Angelicum sa Canduman, Dakbayan sa Mandaue alang sa usa ka programa. — Camille L. Pateres
- Latest
