Bargayo magpalansang na sab

CEBU, Philippines — Magpalansang sa ika-24 ka higayon ang 68-anyos nga si Gilbert Bargayo sa Biyernes Santo sa lungsod sa Tuburan.

Si Bargayo miingon nga karong tuiga maoy ika-unom na niya ka tuig nga buhaton niya nga pagpalansang didto sa Tuburan.

Si Bargayo namulong nga dili lalim nga pagpalansang busa nagbuhat siya og mga butang aron siya maandam sa iyang tulomanon.

Lakip sa iyang pangandam mao ang pagpuasa matag adlaw ug pag-inom lang og tubig nga may lemonsito ug pagkaon og prutas sulod sa kap-atan ka adlaw.

Iya na sab giandam ang iyang kaugalingon sa pagsinati sa kasakit sa paglagbas sa lansang sa iyang kamot ug tiil samtang siya magdupa nga magbitay sa krus.

Dugang ni Bargayo nga bisan pa man nga matag tuig na kini niya nga gibuhat bation gihapon siya og kasakit kon modapat na ang lansang sa iyang kaunoran.

Andam na sab ang iyang purong-purong nga tunokon ug ang mga lansang nga iyang gihumol og garapa nga puno sa alchohol aron luwas kini nga gamiton.

Gawas niana nagsige sab og ampo si Bargayo alang sa iyang pagabuhaton ug alang sa mga tawo.

Sumala pa ni Bargayo nga wala niya kini buhata alang sa iyang kaugalingon lang, kon dili, alang usab sa katawhan aron makasinati sila ug makasaksi unsa ang kasakit nga naagian ni Kristo.

Dako niyang kalipay nga maghinulsol ang mga tawo nga makakita niya ug mobalik sila sa sabakan sa Ginoo.

Si Bargayo nakapalansang na sulod sa 23 ka tuig sukad pa niadtong 1990 diin didto niya gisugdan sa dakbayan sa Tacloban ug didto sa dakbayan sa Carcar. (BANAT NEWS)