Diborsiyo aprub na sa committee level

CEBU, Philippines — Giaprubahan na ang balaudnon alang sa diborsiyo sa kasal diha sa committee level sa Ubos Balay Balauranan.

Ang House' committee on population and family relations miaprubar niadtong Miyerkules sa maong balaudnon aron himuong legal, barato ug paspas ang proseso sa pagpawalay bili sa kasal.Sumala pa nga sa pagkakaron, kinahanglang mogasto ang magtiayong gusto nang magbuwag og gibanabanang P250,000, samtang kadtong mga kwalipikadong “indigent couples” o kadtong kabus nga magtiayong posibleng malibre na sa balayrunon diha sa korte.

Ang maong balaudnon may pagkapareho og unod o basehan sa kasamtangang legal separation sama sa hingulata ang pares, pag- pressure  aron mobalhin og laing relihiyon o political affiliation, kon ang pares nahukmang mapriso og lapas unom ka tuig, adis-adis, palahubog, bayot o tomboy,  pagluib o nangabit, dili makatarunganong pagbiya sa pares.

Kining tanan naa makita sa Title II sa Family Code of the Philippines.

Apan sa maong balaudnon, adunay nadugang nga basehan aron mahimong wagtangan og bili ang kasal, kini mao ang psychological incapacity (nalisoan og pangisip), nagpa sex change, walay hunong nga panag-away ug wala na mag-uban og puyo sud na sa lima ka tuig dihang gisang-at ang petisyon.

Sumala pa nga ang tumong sa maong balaudnon mao ang pagsalbar sa mga anak nga dili sila maapektahan sa kasakit, stress ug kagul-anan sa pagsigeng bugno sa ilang mga ginikanan ug ingon man ang katungod nila nga makasud og laing kaminyoon.

Sa pagkakaron, adunay annulment pinaagi sa pagprubar nga sa sinugdanan pa lang sayop na ang pagpakasal kanila. Gipaabot nga kining balaudnon sugaton og daghang mga kritiko  ilabi na gikan sa Simbahan. (BANAT NEWS)