Duha gipatay, 2 nasamdan

CEBU, Philippines — Duha ka tawo ang gipusil patay, samtang samdan ang duha nila ka kauban nga naangin lang sa buwag nga pagpamusil nga nahitabo didto sa Barangay Adlaon, bukirang barangay sa dakbayan sa Sugbo, ug Barangay Duljo-Fatima ning siyudad.

Ang gipatay didto sa Barangay Adlaon mao si Florencio Leyson, 57, samtang samdan sa paa ang iyang kauban nga si Leonardo Capua, ug gidali pagdala sa ospital dinhi sa dakbayan.

Nasayran sa mga imbestigador sa kapolisan nga si Leyson ug Capua nga pulos taga Sitio Sayaw sa Barangay Adlaon, miadto sa usa ka tindahan aron unta mamalit og sud-an ug abuno.

Matud pa nga kalit lang miabot ang suspek nga si Rolando Arita, 30-anyos ug nagpuyo gihapon sa mao nga sityo, ug gipusil si Leyson sa makadaghan nga higayon.

Si Leyson nakaangkon og pinusilan sa wala pa matino nga kalibre sa armas diha sa iyang ulo, dughan ug mga bukton ug namatay kini diha-diha dayon. Si Capua nga diha sa duol, naigo sa saag nga bala.

Ang mga imbestigador sa homicide section sa Cebu City POlice Office (CCPO) nag-imbestigar pa sa hinungdan nganong gipusil ni Arita si Leyson. Ang suspek wala pa madakpi.

Samtang ang gipatay didto sa Barangay Duljo-Fatima mao si Richard Fuentes, 34, taga sitio Bayotan, ug ang naangol mao ang 49-anyos nga silingan sa biktima nga si Alan Agravante.

Matud ni police investigator Antonio Din nga samtang naglakaw si Agravante sa daplin sa kalsada, nakabantay siya nga may duha ka lalaki nga nagsul-ob og helmet ug nagtaptap sa ilang mga nawong.

Taud-taod, si Fuentes miabot luwan sa usa ka motorsiklo ug gibabagan dayon sa duha ka lalaki, ug dayon gipusil kini sa nagkadaiyang parte sa iyang lawas.

Napagan si Agravante kay natapsingan siya sa bala diha sa iyang paa ug sa iyang kamot. Matud pa abtik kaayo ang duha ka lalaki nga misibat dihang nakita nila nga naigo nila ang target. (BANAT NEWS)