Polis nga nakapatay sa nurse motubag sa reklamo

CEBU, Philippines — Andam nga mutubag ang duha ka polis sa kaso nga ipasaka batok kanila kalabot sa ilang pagpusil patay sa usa ka registered nurse nga armado ug nagpasalba sa armas sulod sa restaurant sa Gaisano Fiesta Mall sa Barangay Tabunok, dakbayan sa Talisay niadtong Lunes sa hapon. Si PO1 Erwin Denila niingon nga gibuhat lang nila ang ilang trabaho ug wala siya’y angay nga ikabalaka sa pagtubag sa kaso nga ipasaka unya batok kanila.

Kini human si Kapitan Raul Cabañero sa Barangay Bulacao, dakbayan sa Talisay ug mao usab ang presidente sa Association of Barangay Council (ABC) nipadayag nga ilahang ipaimbistigar sa Commission on Human Rights (CHR) ang hitabo kong sakto ba ang gibuhat sa mga polis sa pagdughan og igo sa iyang pag-umangkon nga si Michelle Jeff Cabañero Gabutan, 32-anyos.

Si Cabañero nipasabot nga naglagot ang iyang pag-umangkon sa Mang Inasal gumikan sa kalangay sa ilang serbisyo ug sa dihang naabot na ang order dili pa gyud mao.

Gibutyag ni Cabañero nga ang iyang pag-umangkon na-depress tungod kay gibiyaan sa asawa.

Kagahapon si Cabañero ug Superintendent Jason Villamater, hepe sa kapolisan sa siyudad nag-abot atol sa meeting sa Anti-Drug Campaign.

Si Villamater nibutyag nga wala gyud nihisgot si Cabañero labot sa pagpasaka og kaso ngadto sa CHR batok sa iyang mga sakop. (BANAT NEWS)