4 mil kaso sa dengue sa probinsiya sa 2017
CEBU, Philippines — Moabot ngadto sa 4, 912 ka kaso sa dengue ang natala sa Provincial Health Office sa tuig 2017diin sa maong gidaghanon 47 niini ang napatay.
Giingong ubos kini og 4,151 kon itandi niadtong tuig 2016 nga miabot sa 9, 063 ang kaso sa dengue sa tibuok probinsiya sa Sugbo diin sa maong gidaghanon 74 ang patay nga miresulta sa pagdeklara og state of dengue calamity ang probinsiya tungod sa dengue outbreak niadtong 2016.
Base sa datos sa Provincial Epidemiology and Surveillance Unit (PESU) ang buwan sa Enero maoy pinakadaghan ang kaso sa miaging tuig nga miabot ngadto sa 984 kaso.
Matud ni Cyril Pangatungan PESU officer nga taas ang kaso sa buwan sa Enero tungod kay sumpay pa niini ang nahitabo niadtong tuig 2016 apan sa paglabay sa buwan sa tuig 2017 nagkaubos ang kaso sa dengue.
Sa talaan sa PHO moabot na lang ngadto sa 259 ang kaso sa dengue sa buwan sa Disyembre sa miaging tuig.
Base gihapon sa record sa PESU ang dakbayan sa Talisay maoy pinakadaghan nga natala nga kaso sa dengue sa tuig 2017 nga miabot sa 489, gisundan kini sa lungsod sa Consolacion nga 394; Danao 296; Argao 292; Minglanilla 246; Carcar 227; Naga 189; ug Badian 175. (BANAT NEWS)
- Latest
