Angkas, habal-habal drivers patabangon
CEBU, Philippines — Ang kagamhanan sa siyudad sa Sugbo nakigtagbo sa mga lider sa mga asosasyon sa mga habal-habal drivers ug Angkas drivers mahitungod sa preparasyon sa seguridad para sa umaabot nga Sinulog.
Matud ni Executive Assistant Arnel Tancinco nga nakita sa committee ni Konsehal Dave Tumulak nga dako og matabang ang maong mga drivers sa paghatag og impormasyon ug pag-report ngadto kanila sa mga mahitabo sa kadalanan atol sa selebrasyon sa fiesta.
Dugang ni Tancinco, nga aduna silay gihatag nga hotline number sa mga habal-habal drivers kon diin adto nila itext kung unsa nga mga problema sama sa adunay sakyanan nga magub-an sa dalan o adunay mga vendors nga nakaingon sa trapik.
Samtang hangyo usab ni Tumulak kanila nga dili magpalabi og patong sa plite. Mamahimo usab ireklamo sa mga pasahero ang mga habal-habal nga mag-abusar pinaagi sa pagkuha sa ilang plate number ug ang organisasyon sa maong driver ug isumbong kanila.
Giawhag usab niya ang mga pasahero nga adto lang gyud mosakay sa drayber nga nag-uniporme aron paglikay sa peligro sama sa tulis.
Samtang gipasalig sa mayor nga tutokan nila ang kaluwasan ug kalinaw sa kalihokan.
“I want to concentrate all my energies in the peace and order situation…where the trouble is I will be the one to show up,” matud pa ni Mayor Tomas Osmeña.
Gibutyag usab niya nga imbitado sila si Presidente Rodrigo Duterte ug si Bise-Presidente Leni Robredo apan wala siya kabalo kon motambong sila. (BANAT NEWS)
- Latest
