Mga bomberong miresponde gikawatan

CEBU, Philippines — Kapin P80 mil nga kwarta ug mga gamit nangawagtang sud sa Lahug Fire Sub-station tungod kay wala nay nahabilin sa estasyonan kay miresponde sila sa sunog sa Metro Ayala.

Usa sa upat nga nabiktima mao si Senior Fire Officer 2 Archie Custodio, team leader sa unang miresponde sa sunog sa Metro Ayala niadtong Biyernes sa gabii.

Sa pakighinabi kaniya sa Banat News, siya mitug-an nga nawad-an siya og P10 mil nga kwarta ug power bank nga mobalor og P3,500.

Siya miasoy nga niadtong niresponde sila sa maong dakong sunog, nagdali-dali na silang milakaw ug wala na nila masulod ang ilang mga butang ngadto sa mga lockers. Kompiyansa ra sab sila sa lock sa pultahan sa ilang estasyonan.

Si Custodio maoy katapusang nigawas sa maong lawak ug iyang nabatyagan nga kang-a ang ilang sliding window apan wala na lang niya kini panumbalinga tungod sa kadako sa emerhensiya.

Apan sa ilang pagbalik sa estasyon ang ikaduhang team kinsa maoy morelibo unta nila nakugang nga nagkatibulaag na ang ilang mga gamit ug sa pagsusi nila didto nangahanaw na ang ilang mga kwarta ug gamit.

Igo na lang sila sa pagpa- blotter sa Theft and Robbery Section sa Cebu City Police Office, apil sa gikawat ang mga mahalong gamit sa mga kauban ni Custodio nga  cellphone diin mobalor na og P35,000, laptop nga tag P35,000, ug kwarta nga P13,800.

Sumala pa ni Custodio nga gawas sa pultahan makaagi usab sa bintana ang mga kawatan kay gawas nga abli kini pwerte sab niining dakoa. Mamahimo ra usab makaagi pinaagi sa bintana gikan sa barangay health center nga anaa ra tapad nila.

Nagduda silang suhito sa ilang opisina ang kawatan.

“Kining among portahan kung dili ka sweto kay dili gyud ka makaabli  ana. Mao nang salig ra sad mi,” si Custodio miingon. (BANAT NEWS)