Karsada duol sa Metro Ayala gisirad-an

CEBU, Philippines — Ang kadagkoan sa Cebu Business Park nipahibawo sa publiko nga sirad-an ang dalan sa Bohol St., ug ubang parte sa Luzon Avenue sugod kagahapong adlawa hangtod dili pa  masigurong luwas nang agian ang maong lugar tungod sa nahitabong sunog sa Metro Ayala.

Ang Bohol St., kini mao ang dalan nga naggikan sa Cebu Tower 1 hangtud sa main entrance sa Metro Gaisano Ayala.

Si Atty. Jeanette Japzon, Corporate Communication Manager sa Cebu Holdings Inc. (CHI) miingon nga ila kining gibuhat sa pagsiguro sa kaluwasan sa publiko nga moagi sa maong dapit samtang padayon pang nagpahigayon og clearing operations ang kabomberohan.

Hinuon gipasalig ni Japzon nga tugotan nilang makalusot kadtong mga trabahante sa mga establisamento sa Cebu IT. Tower,  Ayala Center Cebu Tower ug FLB Tower.

“Para man pud ni sa ilang safety until suguro ma-clear na ang building,” matud pa ni Japzon.

Ila pud kining gibuhat sa paglikay nga makadala og traffic sa dalan ilabi na nga aduna pa’y mga firetrucks nga nagpadayong nakaestambay sa area.

Samtang ang PUV terminal, ang second floor lang una ang gipagamit kay lahos kini ngadto sa Archbishop Avenue.

Ang first floor sa maong terminal maoy gihimo karong Command Center hangtod mahuman ang clearing operation sa kabomberohan.

“Gi-anticipate nato ang mga tawo ugma maong nihangyo ta sa ilang understanding kay aron pud sa pagtabang sa atong mga firefighters nga naghimo og clearing operations,” si Japzon miingon. (BANAT NEWS)