DepEd-7: Mental health sa mga bata angay atimanon

CEBU, Philippines — Giawhag pagbalik sa mga kadagkoan sa Department of Education sa Central Visayas (DepEd-7) ang mga tunghaan nga hatagan gyud og pagtagad ang mga programa nga makatabang sa mental health sa mga estudyante.

Kini tungod sa lain na usab insidente sa paghikog sa usa ka tinun-an sa usa ka unibersidad dinhi sa dakbayan ang nahitabo niadtong Enero 4 tungod sa matud pa problema sa gugma.

“It is sad to note that cases like these are also happening in our young generation especially with our adolescents. So our role in the education sector is to strengthen our advocacy in helping students on coping up with stressful situations,” sumala pa ni DepEd-7 Administrative Division chief Victor Yntig.

Matud pang Yntig  kinahanglang tudloan pud ang mga estudyante nga makat-on silang mosulti ug mopahungaw sa ilang mga emosyon ug pagbati ngadto sa ilang mga ginikanan, paryente, magtutudlo, mga kahigalaan ug sa  mga tawong ilang kasaligan.

Sumala pa ni Yntig kinahanglang awhagon kanunay sa mga school  officials atol sa ilang mga meetings sa Parent-Teacher Association nga pahinumdoman kanunay ang ilang mga anak nga obserbahan ilang mga kinaiya diha sa balay ug makig-estorya gyud kanila kanunay ilabi na kon lahi na ang linihokan niini.

Kinahanglan usab nga mohimo og inisyatiba ang mga magtutudlo,  guidance counselors ug mga school officials kabahin niini sama sa pag-establisar og komunikasyon ngadto sa mga ginikanan sama sa pagpangonsulta bahin sa ilang obserbasyon sa mga bata. (BANAT NEWS)