Suspendidong polis nangulata?

CEBU, Philippines — Usa ka giingong suspendidong polis ang gipasanginlang nangulata og lineman sa usa ka telecommunication company kagahapon sa buntag diha sa Sitio Kawayan, Barangay Banawa, dakbayan sa Sugbo.

Usa ka JM Bejons ang mi-post sa iyang Facebok kabahin sa maong insidente.

Matud niya nga kagahapon sa mga alas 9:15 sa buntag samtang nagsugod sila  sa ilang trabaho nga gi-assigned kanila diin nagmontar sila og hagdan diha sa usa ka poste aron sa pag-layout sa messenger wire apan aksidenteng naputol ang wire sa kuryente hinungdan nga nag-brownout ang lugar nga dunay koneksiyon sa maong wire. 

Giingong pipila ka gutlo ang nakalabay si Richel Jobeth Catacutan ang mireklamo.

Giingong gipasaligan nila si Richel nga ilang sulbaron ang maong problema sa daling panahon apan giingong ang maong babaye nasuko hinuon kini ug gipangayoan sila og ID.

Matud ni JM Bejons nga dihang mokuha na siya og ID diha sa ilang service vehicle si Richel giingong mibiya ug nanawag sa iyang igsuon nga polis nga si PO3 Elrich Catacutan nga giingong niadtong panahona suspendido sa iyang serbisyo isip polis.

Si JM Bejons mipasangil kang PO3 Catacutan nga misumbag sa usa nila ka kauban apan nakalikay kini sa kumo.

Ug sa kalagot ni PO3 Catacutan ang giatubang na niini ang laing kauban ni JM Bejons nga si “Dondon”. Si JM Bejons mipasangil nga gilabay og bato ni PO3 Catacutan si Dondon kinsa niadtong higayona diha sa ibabaw sa hagdan ug deriyot maigo.

Gisinggitan ni PO3 Catacutan si Dondon nga pakanaogon ug kon dili kini manaog iyahang pusilon. Giingong si PO3 Catacutan nagpakita sa iyang pusil nga giloklok.      

Si Dondon daling mikanaog ug gisumbag ug gipatidpatiran kini ni PO3 Catacutan.           

Matud ni JM Bejons nga atol sa maong insidente wala sila makalihok dayon ug na-panic sila human sila makahibawo nga polis diay ang nangulata.

Dali silang mi-report nagdto sa Guadalupe Police Station ug ang maong insidente na-blotter ug gipatawag si Richel ug giimbistigar kini.

Giingong usa ka officer miawhag nga kinahanglang magpa-medical ang biktima. Human sa medical mibalik sila sa police station apan giingong gi-advised sila nga moadto sa Police Regional Office (PRO) 7 sa mao nilang reklamo apan giingong gi-forward usab sila sa PRO-7 ngadto sa Camp Sotero Cabahug o Cebu City Police Office (CCPO).

Si JM Bejons nagkanayon nga giingnan sila sa nag-atubang nila diha sa CCPO nga pahuwaton sa Lunes tungod kay padalhan pa nila og suwat si PO3 Catacutan.

Ug tungod sa ilang ka dismaya giapil niya og tagged si Cebu City Mayor Tomas Osmeña aron matabangan sila sa mao nilang problema.

Si Osmeña sa iyang bahin, nagkanayon nga giimbistigar na ang maong hitabo ug dili kini angayang i-tolerate. (BANAT NEWS)