Serbisyo Karaban sa Oslob

CEBU, Philippines — Gipahigayon karon ang Serbisyo Karaban sa Kapitolyo sa Lungsod sa Oslob nga gisugdan kagahapon hangtud ugmang adlawa.

Ang maong Serbisyo Karaban ang ikaupat na diin ang unang tulo gipahigayon sa nilabay’ng tuig sa mga lungsod sa Badian, Isla sa Bantayan ug niadtong Marso sa Isla sa Camotes diin nikabat sa P2.8 milyones ang pinansiyal nga hinabang ang gipangapod-apod.

Si Atty. Ramil Abing, executive assistant sa Provincial Administrator’s Office, nagkanayon nga human sa amihanang bahin, ang habagatan na sab karon ang ilang gitumong nga hatagan sa serbisyo.

Ang maong kalihukan gipangulohan ni Gobernador Hilario Davide III, ug Bise Gobernador Agnes Magpale uban sa mga sakop sa Hunta Probinsiyal nga mopahigayon sa ilang out-of-town session sa Oslob ugma ug mga department heads.

Atol sa kalihukan, ang Provincial Agriculture Office manghatag og binhi, kagamitan alang sa pangisda ug ubang kagamitan alang sa agrikultura. Ang Provincial Social Welfare and Development Office ug Provincial Health Office mangapod-apod usab og mga wheel chairs ug health kits.

Ang mga residente sa lugar makadawat usab og libreng bakuna, deworming, vitamins ug antibiotics alang sa ilang mga giatiman nga baka ug kabaw.

Gawas niini ang probinsiya manghatag sab og bakuna alang sa rabies sa Oslob ug sa silingan nga mga lungsod.

Lakip sa maong Serbisyo Karaban ang 350 ka volunteers nga manglimpyo sa kadagatan sa Daanlungsod, Oslob subay sa pagsaulog sa International Coastal Clean-Up Day.

Dunay pagpangapod-apod sab sa mga titulo sa yuta ubos sa land titling project nga gipangulohan sa Provincial Cadastral Council diin 22 ka lokal nga kagamhanan ang nakig-alayon niini.

Giingong 2,750 ka senior citizens ang makadawat sab og mga gasa sa Halad kang Lolo ug Lola.

Lakip sa kalihukan ang medical ug dental mission diin 1,000 ka indibidwal ang gilaumang makabenepisyo niini. - /GMR) (BANAT NEWS)