Sikyu nanion og armas ngadto sa mga estudyante

CEBU, Philippines - Unom ka estudyante sa Cansumog Elementary School sa Lungsod sa Carmen gibati og hilabihang kalisang human giingong gitionan sila og armas sa security guard sa ilang eskwelahan.

Si Police Officer One Manolito Durano sa Carmen Police Station miila sa guwardiya nga si Heracleo Pongautan, 41-anyos nagpuyo usab sa maong dapit.

Matud ni Durano nga walay igong hinungdan ang pagpani-on og armas ni Pongautan ngadto sa mga estudyante.

Ang nahisgutang unom ka estudyante naglibwag og panagan tungod sa kalisang ug nangayo og panabang ngadto sa ilang mga ginikanan.

Ang mga ginikanan sa mga estudyante daling mitaho sa insidente ngadto sa kapolisan. Ang suspetsado gidakop kini sa mga polis ug gitanggong diha sa ilang detention cell.

Nasuta sa mga polis nga ang maong guwardiya nakainom kini og ilimnong makahubog atol sa iyang pagtambong sa trabaho.

Matud usab ni Durano nga ang suspetsado mag-atubang kini og kaso sa paghupot og armas nga walay lisensiya gawas sa kaso nga pagpanghulga. (BANAT NEWS)