Ambulansiya sa kapitolyo may bayad na

CEBU, Philippines - Giklaro sa hepe sa Provincial Health Office (PHO), Dr. Rene Catan, nga ang buot mogamit sa ambulansiya sa mga district ug provincial hospitals adunay bayad.

Apan ang indigents libre kini kung makapakita og mga dokumento sa pagmatuod nga siya indigent.

Giingong P1,500 ang minimum nga bayad sa ambulansiya sa pagdala og pasyente paingon sa tambalanan sa Dakbayan sa Sugbo.

Matud ni Catan nga ang buot mogamit sa ambulansiya direkta kining mobayad sa cashier sa tambalanan aron mahatagan og resibo base sa revenue code sa probinsiya.

Ang mga hospital fees nga makolekta paingon kini sa panudlanan sa probinsiya.

Base sa Memorandum Order No. 2016-10-015 nga giluwatan ni Catan kabahin sa paggamit sa ambulansiya, ang tanang emergency cases nga nagkinahanglan og referral sa ubang tambalanan libre kini.

Ang ambulansiya sa lungsod maoy first call ug last call ang ambulansiya sa tambalanan.

Buot pasabot nga ang ambulansiya sa lungsod maoy unang tawagon o moresponde ug kung wala, ang ambulansiya na sa tambalanan ang gamiton.

Ang doctor on duty o referring doctor maoy modesisyon kung ang pasyente nga i-refer kinahanglang pakuyogan og ambulance call nurse.

Ang ambulance call nurse mokuyog sa pasyente ug dili siya pwedeng mangayo og bayad gikan sa pasyente sa iyang pagkuyog niini.

Ang ambulance call nurse hatagan og incentive matag biyahe ug ang hospital na ang modesisyon kung pila ang ihatag base sa distansiya sa biyahe ug accessibility.

Ang mga trainees dili pwedeng maoy pakuyugon sa pasyente sa ambulansiya. -/GMR (BANAT NEWS)