Gadgets, shabu gilubong sa jail

CEBU, Philippines - Dul-an sa P300 mil nga balor sa drugas ang nasakmit sa mga sakop sa Bureau of Jail Management and Penology sa Talisay City Jail alas 8 sa gabii niadtong Miyerkules.

Matud ni Supt. Gil Inopia Jr. nga bag-o lang natudlo nga jail warden nga matag karon ug unya mopahigayon sila og greyhound operation apan sa nilabay nga gabii aduna nag-training nga mga sakop sa BJMP dili layo sa city jail hinungdan nagpahigayon sila og operation.

Tulo ka gadgets lakip ang drugas ang nasakmit nila sa pangpang sa city jail ug dili sa selda sa mga priso.

Dugang ni Inopia nga tungod sa uwan-uwan nahibulong sila nganong nakankan ang yuta sa may pangpang hinungdan nga lakip kini sa gisusi atol sa greyhound ug didto nakita ang canister nga gilubong ug sa pagsusi adunay sulod drugas ug kagamitan sa pagsuyop.

Dili layo sa drugas nga nakuykoyan ang tulo ka gadgets nga naglangkub sa duha ka cellphone ug Galaxy Note hinungdan nga ila kining gi-turnover sa kapolisan aron masuta ang mga mensahe sa cellphone nga nakuha.

Si Inopia nitug-an nga mopahigayon sila og imbestigasyon aron masayran kung kinsa ang tinuoray nga nanag-iya sa mga kontrabando.

Si Non-Uniform Personnel Marian Ponce sa Talisay City Police Station nitug-an nga mokabat sa 25.08 gramos nga shabu ang nasakmit nga balor og dul-an sa P300 mil.

Mga kontrabando ang nasakmit atol sa gipahigayun nga greyhound operation didto sa Talisay City Jail niadtong Miyerkules sa gabie.

Matud ni Inopia nga ikaduha na kini nilang pagpahigayon og operasyon dihang siya nilingkod isip warden niadtong Lunes. Rowena D. Capistrano ug Gabriel C. Bonjoc (BANAT NEWS)