SOC moatubang sa Sandiganbayan

CEBU, Philippines - Gibasura sa Sandiganbayan Fifth Division ang giduso nga motion to dismiss ni kanhi Talisay mayor ug karon Konsehal Socrates Fernandez kabahin sa kasong obstruction of justice.

Ang maong kaso may kalabutan sa nahitabo niadtong Hunyo 4, 2010 sa usa ka repair shop sa Barangay Lawaan 2 diin giingong giablihan ni Fernandez ang iyang Isuzu Big Horn bisan ubos sa kustodiya sa kapolisan dihang nakasugat og aksidente ang anak niini nga si Joavan Fernandez.

Ang kamanduan giluwatan ni Associate Justice Chairperson Rafael Lagos ug gipirmahan sab nilang Associate Justices Reynaldo Cruz ug Maria Theresa Mendoza.

Gikatakda ang arraignment sa kaso karong Hunyo 6, 2017.

Sa sayo pa si Fernandez nangangkon nga nalapas ang iyang katungod sa “speedy disposition” sa iyang kaso tungod kay giingong gilangan kini sa buhatan sa Ombudsman sukad kini gisang-at niadtong Hunyo 11, 2010.

Agosto 2, 2010 niluwat ang Ombudsman og order ug nadawat kini ni Fernandez niadtong Septiyembre 28, 2010 sa pagduso sa iyang counter-afidavit sulod sa 10 ka adlaw.

Oktubre 18, 2010 si Fernandez niduso sa iyang counter-affidavit ug niadtong Disyembre 11, 2015 nadawat ni Fernandez ang kopya sa resolusyon nga dunay petsa nga Abril 28, 2011 sa pagpasaka sa kaso ngadto sa Sandiganbayan.

Niadtong Disyembre 21, 2015 si Fernandez niduso og motion for reconsideration.

Matud ni Fernandez nga niadtong Marso 1, 2017 personal na lang siyang niadto sa Office of the Clerk of Court ug nangayo og kopya sa resolusyon nga nagbasura sa iyang MR.

Laing pasangil ni Fernandez nga nilanat sa lima ka tuig ang pagresolbar sa Ombudsman sa iyang kaso ug nilanat ngadto sa usa ka tuig ang pagsang-at sa information sa iyang kaso niadtong Pebrero 13, 2017. - /GMR) (BANAT NEWS)