Pagdagsa sa mga taga Mindanao monitoron

CEBU, Philippines - Ang chairman sa Regional Peace and Order Council (RPOC) Gobernador Hilario Davide, III gikatakdang makigtigom sa mga kadagkuan sa kapolisan ug kasundalohan nganhi sa rehiyon aron tukion ang posibleng pagdagsa sa mga bakwit gikan sa Lanao del Sur.

Gibutyag ni Davide nga mipatawag siya og special meeting tali sa mga miyembro sa RPOC karong unang adlaw sa buwan sa Hunyo.

Matud ni Davide nga giimbitar usab niya nga mutambong sa mao unyang meeting ang lider sa mga Muslim nganhi sa Sugbo.

 Sa maong meeting gilauman nga ang mga lider sa Muslim makahatag og mga impormasyon kabahin sa mga nahitabo  ngadto sa Marawi tungod kay posibleng ang mga Muslim nganhi sa Sugbo dunay mga paryente ngadto sa lugar nga naapektohan karon sa engkwentro tali sa tropa sa gobiyerno ug Maute.

Ang gobernador mipadayag sa iyang pag-uyon nga ang mga apektadong Muslim ngadto sa Marawi mobakwit nganhi sa Sugbo. Apan ila usab ikonsiderar ang rekomendasyon sa kadagkoan sa kapolisan ug kasundalohan aron pagsiguro usab sa kahusay ug kalinaw nganhi sa Sugbo.

Gipasabot sa gobernador nga dili angayang mokom-piyansa kay basin unya og dunay terorista nga mosagol sa mga sibilyan nga Muslim nga magpakaaron-ingnong bakwit usab unya diay maghatag lang og kasamok nganhi sa Sugbo. (BANAT NEWS)