21 ang nasikop, usa nakaeskapo

CEBU, Philippines - Nasikop ang 12 ka tawo sa managlahi nga operasyon sa Dakbayan sa Talisay ug Sugbo diin lakip niini ang usa ka high value target sa Barangay Talamban.

Unang operasyon nahitabo sa may Sitio Rattan, Barangay Tangke, Dakbayan sa Talisay, alas 7:40 niadtong Lunes sa gabii.

Ang nasikop mao sila si Charson Tabora, 41, alyas Pardo; Julie Barrera, 24, ug Mark Anthony Cabando, 19, taga Sitio Tunga, Tangke, ug nakaeskapo ang subject nga si Sherwin Cabulao alyas Lupin.

Matud ni Supt. Emerson Dante nga dali naka-eskapo si Cabulao human nakabantay nga polis ang iyang ka transaksiyon ug nahitabo ang komosyon ug nasikop ang mga kauban niini.

Dul-an sa P50 mil nga kantidad sa drugas ang nasakmit gikan sa mga dinakpan.

Ikaduhang operasyon nahitabo sa Barangay Talamban diin nasikop ang usa ka high value target nga si Gerald Datu, kinsa giingong tigbagsak og drugas sa pipila ka sitio sa barangay.

Matud ni Police Senior Inspector Arieza Otida, hepe sa Talamban Police Station, nga base sa mga mensahe ni Datu sa cellphone nga aduna kini mga bagsakan sa Talamban nga maoy ilang ginuntan hinungdan sa pagkasikop sa laing walo ka tawo sa may Highway 77.

Gawas sa mga binulto nga drugas nakuha nila kang Datu, laing mga pinutos nga drugas, armas ug kagamitan sa pagsuyop ang nakuha sa panimalay ni Donna Fernandez kinsa adunay duha ka menor de edad nga anak nga apil sa nasikop.

Ang mga dinakpan nanghimakak sa pasangil batok kanila.

Si Kapitan Dario Arcilla sa Talamban mahinangpon sa operasyon nga gipahigayon tungod kay dugay na usab niyang gi-report ang balay nga gihimong suyopanan sa Highway 77.

High value targets

Sa Dakbayan sa Lapu-Lapu, nasakmit sa buy-bust operation sa kapolisan ang mokabat sa P75, 638 nga kantidad sa shabu gikan sa gikatahapang pusher nga nadakpan sa Sitio Soong 1, Barangay Mactan alas 4 pasado sa hapon sa niaging adlaw.

Si Senior Inspector Joey Bicoy sa City Intelligence Branch sa Lapu-Lapu City Police Office niila sa nadakpan nga si Markley Obas Aying alyas Mark Lee, 28, nagpuyo sa maong dapit.

Matud ni Bicoy nga ang suspek giila nga high value target sa maong dapit bisan sa talaan sa Philippine Drug Enforcement Agency.

Sa Dakbayan sa Toledo, laing high value target drug personality ug duha ka pushers ang nasikop niadtong Lunes.

Nasikop si Rannie Yongco, 39, kinsa giila nga top 3 most wanted person sa Toledo.

Matud ni PO3 Leonides Leduna sa Toledo City Police Station nga mobaligya kini og dili mominus sa 25 ka gramos sa shabu matag semana.

Nakuhaan kini og usa ka medium ug pito ka gagmay’ng pakete sa gituohang shabu.

Samtang ang duha ka pushers nga sila si Alberto Bacalso Tapanan Jr., 25, ug Jose Marvin Benitez Nalinay, 42, nasikop sa Sitio Harden, Barangay Ilihan, kinsa nakuhaan og duha ka medium ug lima ka gagmay’ng pakete sa gituohang shabu nga balor og P10,000.

Sa Dakbayan sa Mandaue, nadakpan sa buy-bust operation ang usa ka Allan Tigas, 32, taga Barangay Guizo, Bariel Arnado, 34, ug Francisco Climaco, 38.

Ang ilang kauban nga nadakpan mao sila si Jovanie Oriz alyas Jojo, 38, taga Calubihan, Yati, Liloan, ug nasakmitan og tulo ka gamay nga pakete sa shabu ug mga drug paraphernalia.

Sa Lungsod sa Consolacion gisikop ang 37-anyos nga pusher sa buy-bust operation sa Barangay Garing kagahapon sa kadlawon.

Ang nadakpan giila nga si Roseller Ermac, residente sa maong barangay, ug nasakmit gikan kaniya ang upat ka medium nga pakete sa shabu. Rowena D. Capistrano, Romeo T. Limpangog, Gabriel C. Bonjoc, ug Hazel Secop ug Rhena E. Pizarra (BANAT NEWS)