Kabarangayan subling gibansay sa CPADAO
CEBU, Philippines - Nibalik na pagpahigayon og training ang Cebu Provincial Anti-drug Abuse Office (CPADAO) ngadto sa mga opisyal sa barangay kalabot sa community based training program sa mga drug surrenderer.
Subay ang maong lakang sa pagsunod na sa CPADAO sa framework nga gigamit sa Department of Health (DOH).
Ang DOH migamit kini og Matrix Intensive Outpatient program (MIOP) isip treatment program sa mga drug surrenderer samtang ang assessment tool nga gigamit sa ahensiya mao ang Alcohol, Smoking and Substance Involvement Screening Test – Brief Intervention (ASSIST-BI).
Ang pangulo sa CPADAO nga si Carmen Meca nagkanayon nga karon ilang gipaspasan ang pagbansay og balik sa mga barangay health worker alang sa community based treatment sa mga drug surrenderer ilabina nga anaa sila karon sa drug clearing kun diin usa sa mga parameter sa Dangerous Drug Board mao ang “absence of drug user” sa mga barangay.
Niadtong Mayo 3 hangtud 5, gisugdan sa CPADAO ang pagbansay sa mga barangay worker sa habagatan ug amihanang bahin sa lalawigan nga maoy motabang nila pagtudlo sa ubang barangay sa framework nga gigamit sa DOH atol sa himoong pagpatuman sa pilot projects.
Ang CPADAO mopili kini og tag duha ka barangay sa matag lungsod o dakbayan aron ilusad ang pilot project gamit ang framework sa DOH. - /DILT) (BANAT NEWS)
- Latest
