Mayor ug hepe “nagkabikil” sa reward

CEBU, Philippines - Ang mayor sa lungsod sa Consolacion Teresa Alegado ug hepe niini sa kapolisan Chief Inspector Roderick Gonzales giingong nagkabangi tungod sa drug cash reward gikan sa Cebu Provincial Anti-Drug Abuse Office (CPADAO).

Giingong wala ipahatag sa mayor ang P300 mil nga drug reward sa kapolisan nga gihatag sa CPADAO niadto pang buwan sa Nobiyembre sa milabay’ng tuig.

Apan si Alegado nga nahinabi sa Banat News mihimakak, miklaro sa pasangil batok kaniya.  Matud ni Alegado nga ang iyang accountant wala mo-release sa kwarta tungod kay wala’y gihatag nga program of works ang kapolisan nga gamitan nila sa kwarta. Matud sa mayor nga ang iyang accountant mangutana pa sa CPADAO sa guidelines sa pag-release  sa premyo kay basin  makuwestiyon sila sa Commission on Audit (COA).

Gikompirmar sa hepe sa CPADAO, Carmen Remedios Durano Meca nga niadtong buwan sa Nobiyembre napiling Top 1 Performing Police Station batok sa ilegal drugs ang Consolacion Police Station subay sa Sukod Program sa probinsiya.

Sila  gihatagan og pahalipay nga P300 mil. Ang Anti-Drug Abuse Council (ADAC) sa maong lungsod mao say Top 2 best performing  drug abuse council sa kalungsoran ug nakadawat usab og P300 mil nga reward. Ang CPADAO miisyu og duha ka tseke sa maong mga rewards ug direkta kining gisulod sa panudlanan sa lungsod kay  wala’y bank account ang police station ug dili pwedeng isulod kini sa personal account sa hepe.

Matud niya, aron makuha ang maong premyo kinahanglang moduso  og program of works kung gamiton sa proyekto o ipamalit og mga gamit sa polis. Kun ihatag lang ngadto sa mga sakop ipaagi kini sa payroll nga maoy basehan sa COA liquidation apan kinahanglang  balido ang rason. Matud ni Meca pinasubay kini sa guidelines sa COA.

Si Alegado nagtuo nga nasuko ang hepe kay iyaha kining gipatawag bahin sa ilegal nga tigbakay sa Poblacion Oriental   niadtong Huwebes Santo ug Biyernes Santo nga way permit sa barangay. Adunay gihatag nga permit ang municipal administrator alang lang sa usa ka adlaw   nga tigbakay apan miabot og usa ka semana ang tigbakay nga wa badlonga sa mga polis.

Samtang si Sr. Supt. Jaime Quiocho, hepe sa community relations sa Cebu Provincial Police Office (CPPO) miingon nga wala pa sila makadawat sa reklamo ni Alegado nga gustong parelibohan si Gonzales.

Si Gonzales sa iyang bahin miingon nga husto nga sa account sa munisipyo gibutang ang maong kwarta apan nahibulong siya kun nganong gipangayoan pa sila og program of works nga sa iyang pagsabot pahalipay man kini, iya usab  tahuron kung dunay reklamo si Alegado. Brenda Batuto ug Camille Pateres (BANAT NEWS)