Pasilotan apil ang mga ginikanan

CEBU, Philippines - Naglaraw ang konseho sa Dakbayan sa Talisay nga amendahon ang curfew ordinance sa siyudad aron mabutangan kini og ngipon   nga dili pwedeng yaga-yagaan ra sa mga batan-on nunot sa pagharihari karon sa mga gangs.

Si Bise Mayor Alan Bucao nipadayag nga daghang probisyon sa kasamtangang ordinansa ang dili na magamit karon ug barato o dili kaayo bug-at ang silot sa mga makalapas.

Matud pa niya nga kinahanglan iapil sa ilang pag-amendar nga masilotan ang mga ginikanan sa mga menor de edad nga madakpang magsuroy-suroy pa sa lawom nga kagabhion.

Gani sa iyang pag-obserbar, aduna’y mga barangay nga seryoso apan aduna sa’y daghan nga barangay nga dili seryoso sa pagpatuman sa curfew ordinance.

Siya miingon nga iapil usab unya sa kausaban ang pagsilot sa mga barangay opisyales nga dili seryoso sa pagpatuman sa curfew ordinance.

Naalarma si Mayor Eduardo Gullas sa dihang aduna’y 16- anyos nga babaye ang namatay human gipusil niadtong miaging buwan tungod sa panagribal sa mga gangs sa mga kabataan sa maong siyudad.

Nahibaw-an nga sakop sa Kalmados ang namatay nga dalagita samtang ang nagpusil kaniya sakop sa karibal nila nga grupong Stay True Young (STY).

Ang maong mga gangs maoy naghari karon sa kadalanan ug way nahimo ang mga polis ug mga barangay opisyales aron sila mahunong sa ilang gipanghimo sa nangaging mga adlaw. (BANAT NEWS)