Barangay konsehal ikiha sa PIB
CEBU, Philippines - Pasakaan gihapon og kasong ilegal nga paghupot og armas ang barangay konsehal sa Valladolid, Siyudad sa Carcar bisan wala kini atol sa pagsilbi sa search warrant sa mga sakop sa Provincial Intelligence Branch.
Matud ni Supt. Joie Pacito Yape Jr., hepe sa PIB, nga ang tulo ra ka igsuong babaye ni Konsehal Ryan Sagulili ang pasakaan og kasong ilegal nga sugal human sila naaktuhan nga nag-tally niini sa luyo sa panimaye sa suspek.
Nakuha gikan sa panimaye ni Sagulili ang duha ka bala sa kalibre .9mm nga pusil.
Wala gisakmit sa kapolisan ang kagamitan sa ilegal nga swertres nilang Thelma Bardinas, 60; Amina Bardinas, 22, ug Rosel Sagulili sanglit wala kini nalakip sa search warrant.
Sa laing bahin, nadakpan ang usa ka aser sa ilegal swertres sa Sambagan, Tabunok, Dakbayan sa Talisay niadtong Domingo sa gabii.
Ang dinakpan mao si Carlito Antig, 46, biyudo nga taga Upper Sambagan, kinsa nakit-an nga sekretong naglista og numero sa ilegal swertres hinungdan nga ila kini gisignit.
Nakuhaan siya og stub, ballpen ug uban pang kagamitan sa pagpamaligya og numero.
Samtang laing nagpasiugda og ilegal nga swertres ang nadakpan sa akto sa nagpatrolya nga kapolisan sa Pulpogan ug Tayud, Lungsod sa Consolacion.
Si Police Officer 1 Jenny Rusiana sa Consolacion Police Station niila sa nadakpan alas 6 pasado sa niaging gabii nga si Romeo Alvio Ermac, 62, nagpuyo sa maong dapit.
Nakuha sa kapolisan nga mga ebidensiya mao ang mga tally sheet, stub ug uban pa.
Laing nadakpan alas 8 pasado sa niaging gabii mao si Jeffrey Olivar Pepito, 25, taga Tayud, kinsa nasakmitan og P366 nga gituohang halin, mga binandol nga stub ug uban pa. Camille L. Pateres, Gabriel C. Bonjoc ug Romeo T. Limpangog (BANAT NEWS)
- Latest
