Biyudo ug Amerikano, napalgang patay
CEBU, Philippines - Lawas sa 83-anyos nga lolo nakit-an nga hapit nang madugta sa Lungsod sa Dalaguete niadtong Huwebes sa buntag.
Ang maong patay’ng lawas giila nga si Benito Jorge, taga Brgy. Bulak sa nahisgutang lugar. Nakit-an kini sa barangay tanod nga si Honorato Entoma kinsa mao say mitaho sa kapolisan.
Matud ni PO1 Ariel Cordova nga katapusang nakit-an ang biktima niadtong Martes alas 4 sa hapon nga hubog human namista sa Brgy. Manlapay. Dugang niini nga walay pamilya nga nangita sa biktima.
Sa gihimong imbistigasyon, natagak ang biktima sa pangpang nga gibana- banang adunay gilawmon nga 10 ngadto sa 15 metros.
Napalgang patay sab sulod sa iyang gipuy-ang hotel room sa Brgy. Kamputhaw, Cebu City ang 84-anyos nga American national nga giilang si Gerald Leonard Pitman niadtong Huwebes sa buntag.
Base sa gihimong pakisusi, ang mga caregiver sa biktima miingon nga ilang gituktok ang kwarto niini apan wala sila ablihi hinungdan nga nananghid sila sa front desk sa maong hotel. Dihang pag-abli nila sa kwarto, ilang nakit-an ang biktima nga naghayang sa higdaanan ug wala magginhawa.
Dugang impormasyon nga nakuha, nasayran nga adunay sakit ang biktima ug wala kini nagpadala sa tambalanan.
Anaa karon ang patay’ng lawas sa biktima sa Cebu Rolling Hills Funeral Homes. Rhena Pizarra ug Raziel Sumayang (BANAT NEWS)
- Latest
