Mga vendors ug nasunogan makigtagbo ni Arsobispo Palma

CEBU, Philippines - Ang kadagkoan sa Mandaue City Sidewalk Vendors Association ug ang mga nasunogan sa Barangay Guizo ug Mantuyong, makigtagbo ni Archbishop Jose Palma aron ipadangat ang ilang sentimento kabahin sa ilang sitwasyon nga padayon silang gigukod sa demolisyon.

Matud ni Bernie Aneslagon nga gawas sa ilang gipahigayon nga pulong-pulong kagahapon, aduna pa sila’y laing mga kalihukan nga gihan-ay aron mahatagan sila og pagtagad sa mga opisyal sa Dakbayan sa Mandaue nga wala gyud makig-atubang kanila.

Sumala pa ni Aneslagon nga karong Mayo 1 aduna sila’y ipahigayon nga lihok protesta batok sa kagamhanan sa Mandaue. Apan karong Mayo 3, gikatakda nga ang grupo nila ni Aneslagon makigtagbo ni Arsobispo Palma aron unta sila matabangan sa ilang problema.

Si Aneslagon miingon nga kun magkatagbo na sila si Arsobispo Palma ug ang mga opisyal sa Mandaue apan dili gihapon mahatagan og pagtagad ang ilang problema, anha na nga higayona nga mopasaka sila og reklamo sa Visayas Ombudsman. Gihulagway ni Aneslagon nga dili gyud makiangayon ang gibuhat sa mga opisyal sa Mandaue ngadto kanila. Iyang gihulagway ang giingong dili makiangayon nga sistema sa paghimo og masterlist ug pag-raffle sa gobiyerno sa Mandaue sa mga lote.

Apan si Atty. Elaine Bathan, ang chief of staff ni Mayor Luigi Quisumbing nibutyag nga sila sa dakbayan igo ra nga niimplementar kun unsa ang anaa sa balaod, ug nihatag usab sila’g kahigayonan ngadto sa mga manindahay sa paghipos sa ilang mga tinda nga ilegal nga gi-display sa wala itugot nga dapit.

Dugang pa ni Bathan nga wala nila kulbi sa kaldero ang mga manindahay basta motuman lang sila sa mga balaod sa siyudad. Matud ni Bathan nga kanunay sila nga maghimo og tigum sa mga hingtungdang tindera.

Kabahin sa mga nasunogan, matud ni Bathan nga gipahibalo na nila daan ang mga wala malakip sa masterlist ug sa raffle, ug gipasaligan nga pangitaan sila og pamaagi nga dili sila mabiyaan ug mapahimutang gihapon sila.

Gipasalig ni Bathan nga ang mga 200 ka pamilya nga nagpuyo karon atubangan sa Cebu International Convention Center (CICC) dili nila papahawaon nga dili kapangitaan og dapit nga ilang kabalhinan. (BANAT NEWS)