15 na ang patay sa dengue
CEBU, Philippines - Miabot na sa kinse ang natalang namatay tungod sa dengue sa Lalawigan sa Sugbo base sa talaan sa Provincial Health Office.
Ang Lungsod sa Consolacion mitala sa labing taas nga kaso nga nabiktima sa dengue karong tuiga. Nagsunod niini ang mga dakbayan sa Talisay, Danao, Toledo, Carcar, kalungsuran sa Moalboal, Minglanilla, Argao, Badian ug Liloan.
Nasayran nga upat ang namatay sa Consolacion, tulo sa Minglanilla, duha sa Talisay, usa sa Pinamungajan, duha sa Danao, usa sa Liloan, usa sa San Fernando ug usa sa Dumanjug. Ang labing bag-ong kaso sa namatay natala karong buwana sa Lungsod sa Minglanilla diin usa ka bata ang namatay. Gumikan niini, gipahimangnuan sa PHO ang katawhan sa 4S strategy pagpakgang sa sakit nga dengue. Pamela Faith Pogoy (BANAT NEWS)
- Latest
