ASEAN meeting sa Panglao nagmalampuson

CEBU, Philippines - Wala makaapekto ang presensya sa mga sakop sa Abu Sayyaf sa gipahigayong Association of Southeast Asian Nations (ASEAN) meetings sa Panglao, Bohol matud pa ni Police Regional Office-7 Director Noli Taliño.

Gihimug-atan ni PCSupt. Taliño nga napakyas ang plano sa mga bandido nga manggubot kini gumikan sa koordinasyon sa mga Local Government Unit ug komunidad sa Bohol.

Gumikan sa zero incident rate sa maong kalihokan, adunay laraw nga laing meeting sa ASEAN ang himoon na sab sa Bohol.

Taliwala sa mga travel advisory gikan sa ubang nasud, wala silay nadawat nga adunay mi-backout nga delegado bisan og normal kini nga aduna gyuy mo-backout.

Kun kaniadto dul-an 70 ang gilauman nga mangabot nga delegado apan 88 ang nisalmot. Gani, adunay uban nga mipadayag nga mobalik kay nakuwangan sila.

Asoy ni Taliño nga kanunay andam ang PRO-7 sa mga dagkung kalihokan sama sa ASEAN tungod sa hugot nga seguridad nga ilang gipatuman.

Matapos karong Sabado ang ASEAN Summit diin gihimo ang mga nahabiling kalihukan niini didto sa Philippine International Convention Center sa Pasay City.

Samtang atol sa flag raising ceremony sa lokal nga kagamhanan sa Lungsod sa Panglao, gipasidunggan ang tanang mitabang sa ASEAN meeting.

Gitagbo usab ni Taliño ang mga kapitan ug mga sakop sa Sangguniang Bayan sa dapit aron mas mapalig-on pa nila ang seguridad sa dapit. Camille L. Pateres ug Rowena D. Capistrano (BANAT NEWS)