Badjao patabangon paghipos sa basura

CEBU, Philippines - Dili lang mga barangay sa Siyudad sa Sugbo ang makapahimulos sa programa nga “Basura Mo, Sardinas Ko” apan lakip na ang Badjao community sa siyudad sanglit kuhaon ang ilang serbisyo aron makatabang sa problema sa basura ilabi na sa kabaybayunan.

 Ang “Basura Mo, Sardinas Ko” usa ka programa sa siyudad nga gisugdan sa Barangay Cogon Pardo ug Lahug diin ang usa ka plastic nga basura bugtian og usa ka latang sardinas.

Nakatabang ang maong programa sanglit ang mga tawo manghipos na man sa ilang basura ug kadtong mga gipanglabay sa kasapaan kuhaon na sab aron mailisan og sardinas.

Nunot niini, dili lang ang kasapaan maoy malimpiyo karon apan lakip na ang kabaybayunan sa siyudad human nakita ni Mayor Tomas Osmeña nga maayo ang sugyot nga ilambigit ang mga Badjao sa programa.

Gitahasan ni Osmeña ang Department of Public Services (DPS) sa pagpatuman sa maong programa.

Subay niini, sigun sa assistant head sa DPS, John Paul Gelasque, nga natapok na niya ang mga Badjao sa siyudad kagahapon ug iya na kining gipahibawo sa maong programa.

Matud ni Gelasque nga ang mga Badjao andam makig-alayon sa siyudad.

Gipaabot nga masugdan ang maong programa sa Mayo sanglit sa pagkakaron naa pa man sila sa planning stage. (BANAT NEWS)